எனது வாழ்க்கைக்குள் வந்த இன்னொரு தேவதை...!!!

என் வாழ்க்கைக்குள் வந்த இன்னொரு தேவதையை பற்றி சொல்லப்போறேன். கடந்த ஐந்து வருடங்களுக்கு முன் நான் ரிசப்ஷனில் பணியில் இருந்த சமயம், எங்கள் ஹோட்டல் காப்பிஷாப்பில் அநேக வெளிநாட்டுக்காரிகள் வெயிட்டரஸாக பணிபுரியும் நேரம்....

இவர்கள் டியூட்டிக்கு போகும் போதும் திரும்பும் போதும் என்னை கடந்துதான் போகவேண்டும், அல்லாமலும் கஸ்டமர் கிரெடிட் கார்டு கொடுத்தாலும் இவர்கள் என்னிடம் வந்தாகவேண்டும், ஏன்னா கிரெடிட் மெஷின் ரிசப்ஷன்லதான் இருக்கும்.

இப்பிடியாக இருக்கும் போது ஒருநாள் புதிதாக ஒரு பெண் வெயிட்ரசாக வந்தாள், அண்டங்கருப்பு என் வாழ்க்கையில் அப்பிடி ஒரு கருப்பை பார்த்ததில்லை, ஆச்சர்யமாக இருந்தது, நான் மனதில் நினைத்தேன் இது ஒன்னு ஆந்திராவா இருக்கணும் இல்லைன்னா தமிழா'தான் [[எத்தியோப்பியா கருப்பில்லையா'ன்னு கேக்க்ப்புடாது அவிங்க பாடி ஷேப் வேற]]

நேரே என்னிடம் வந்தாள் புதிய அப்பாயின்ட்மென்ட் லெட்டரை காண்பித்தாள், காண்பித்து விட்டு காப்பிஷாப் எங்கே இருக்கிறது என்று சூப்பர் ஆங்கிலத்தில் கேட்டாள், வழி காண்பித்தேன், வேகமாக கடந்து சென்றவள் திரும்பி வந்து வழி தெரியவில்லை என்றாள். நான் எனது அஜிஸ்டென்டை அவள் கூட அனுப்பிவிட்டேன்.

தினந்தோறும் அவள் டியூட்டிக்கு வரும்போதெல்லாம் எங்கள் கண்கள் மோதிக்கொள்ளும், ஆனாலும் அவள் குட்மார்னிங் சொல்லவே மாட்டாள் நானும் கண்டுகொள்ளமாட்டேன், அவளுடன் வரும் மற்றைய பெண்கள் குட்மார்னிங் சொன்னாலும் இவள் வாய் திறக்கமாட்டாள்...!!!

ஒருநாள் காப்பிஷாப்பில் இருந்து கம்லைன்ட் வந்தது நன்றாக குடித்திருந்த அரபியை செருப்பால் அடித்துவிட்டாள் ஒரு வெயிட்ரஸ் என்று, ஓடிப்போனேன் நாட்டாமைக்கு, அங்கே பத்ரகாளியாக நின்று கொண்டிருந்தாள் அவள்....

என்னாச்சு என கேட்கவும், அரபி இவள் பின்னாடி பிடித்து அமுக்கி இருக்கிறான், அதான் செருப்படி, அரபியை ஹோட்டல் காவலர்கள் பிடித்துக்கொண்டார்கள், அரபி கிடந்து கத்துறான், நீ ஒரு சிறிலங்காகாரி, என் நாட்டுக்கு பிழைக்க வந்ததுக்கு என்னையே செருப்பால் அடிக்கிறாயா உன்னை சும்மாவிடமாட்டேன்னு கத்துறான்.

அப்போதான் தெரிஞ்சுது இவள் சிறிலங்கா என்று, எவளவோ எடுத்து சொல்லியும் அரபி அடங்கவில்லை, பேசிட்டு இருக்கும்போதே அரபி ஓடிப்போயி அவளை அடித்துவிட்டான், எனக்கு பிரஷர் ஏற, அரபி தலையில் கட்டியிருந்த கருப்பு வாரை பிடுங்கி விளாச ஆரம்பிக்கவும் எங்கள் செக்கியூரிட்டிகள் அரபியை மொத்தி தூக்கிப்போனார்கள் ஸ்பெஷல் ரூமுக்கு [[எதுக்கு உள்ளே போட்டு மிதிக்கதான்]]

ஜி எம் விசாரணை வந்தது, பாழாப்போன ஹோட்டல் தர்மம் ஒன்னு உண்டு "கேஸ்ட் இஸ் ஆல்வேஸ் ரைட்"ன்னு அந்த சூத்திரத்துல என்னை ஐந்து நாள் சஸ்பென்ட் பண்ணி உத்தரவு வந்தது [[ஹி ஹி நமக்கு இது புதுசா என்ன]]

மறுபடியும் டியூட்டியில் சேர்ந்தும், அவள் என்னோடு பேசவில்லை அதே கண்கள் பார்வை மோதல்'தான், ஒரு நாள் பில்லுக்கு கிரெடிட் கார்ட் கொண்டு வந்தாள் என்னிடம், நான் கார்டில் வேலை செய்வது போல பாவனை செய்துகொண்டே அவளை லுக் விட அவள் எங்கோ வெறித்து பார்த்துக்கொண்டிருந்தாள், அழகு, கருப்புன்னாலும் அவள் முகத்தில் தெரிஞ்ச தேஜஸ் அழகோ அழகு, கண்கள் பால்போல் வெள்ளை.....!!!

இப்படி தொடர்ந்து நடந்துட்டு இருந்தது, ஒருநாள் உற்சாகத்தில் டியூட்டிக்கு வந்தவள், அவளை அறியாமலே குட்மார்னிங் சொல்லிவிட்டு ஆஹா தெரியாம சொல்லிட்டோமேன்னு வாயை பொத்திக்கொண்டே சிரித்துக்கொண்டே ஓடிவிட்டாள் எனக்கோ கொலைவெறி ஹி ஹி....!!!

பிறகு நாளாக நாளாக சகஜமா பேசியும் [[ஆங்கிலத்தில்தான்]] பழகியும் இருந்தோம் ஒரு வெற்றிடம் இருந்தே வந்தது, ஒருநாள் இவள் கிரெடிட் கார்டு கொண்டு வரவும் இந்தியாவில் இருந்து என் மனைவியின் போன் வந்தது சாதாரணமாக மிஸ்கால் குடுக்கிறவள், போன் பண்ணுகிராளேன்னு பதட்டமா போனை எடுத்து தமிழில் பேசி போனை வைக்க....

இவள் கேட்கிறாள், நீஈஈஈஈஈஈஈஈஈஈங்க தமிழா....??? என்று தமிழில் கேட்க, எனக்கு தலை சுத்த ஆரம்பிருச்சு, அவள் மறுபடியும் நீங்க தமிழரா'ன்னு வேப்பிலை அடிக்க, ஆமாம் என்றேன், அப்போ இவ்வளவு நாளும் இந்தியாகாரங்க கூட மலையாளம் கதைத்து கொண்டிருந்தீர்களே...??? நான் உங்கடை மலையாளின்னு கருதினேன்னு சொல்ல, எனக்கு கதைத்து என்பது புரியவில்லை [[ங்கே]] திட்டுறாளோன்னு நினச்சி கேட்டதுக்கு, கதைத்தல் என்பது பேசுவது என்பதாகும்னு விளக்கம் தந்தாள், அன்னைக்குத்தான் எனக்கும் தெரியும்!!!!

அம்மிணி, நான் மலையாளி இல்லைன்னு சொன்னால், மலையாளி அடிக்க வாரான், தமிழன்னு சொன்னா நீங்க அடிக்கவாறீங்க, எனக்கு இது ஒன்னும் புதுசில்லைன்னு சொன்னேன், அடபாவி மகள், இம்புட்டு வாயாடியா இருப்பாள்னு தெரியாது, நான் தமிழ்னு தெரிஞ்சதும் அவள் கண்ணில் அடிச்ச ஒளி இருக்கே, மின்னல் தோத்துரும் போங்க...!!!

பிறகு எல்லா நாளும் குட்மார்னிங்'தான் குட்ஈவினிங்'தான், கொஞ்சல்தான், என்ன சாப்பிட்டாலும் எனக்கு பங்கு வந்துரும், வேண்டாம்னு சொன்னால் அழுதுருவாள், இப்படியே நாட்கள் கடக்கையில் என் குடும்ப மேட்டர் எல்லாம் சொல்லுவேன் அவளிடம், ஆனால் அவள் வாய் திறக்கமாட்டாள்...!!!

ஒருநாள் வேலை முடிந்து என்னிடம் வந்தாள், மனோ உன்கூட தனியாக பேசவேண்டும், என் ரூமுக்கு வரமுடியுமா என்று கேட்டாள், ரூமுன்னதும் நான் பயந்ததை புரிந்து கொண்டு, எனது பர்சனல் கதையை உன்னிடம் சொல்லணும் போல மனசு தவிக்குது, இங்கே ஆட்கள் வந்தும் போயும் இருக்கிறார்களே எனக்கூரவும் ஒப்புக்கொண்டேன்.

அவள் ரூமுக்கு போனேன் அடுத்தநாள், அருமையாக சமைத்து வைத்திருந்தாள், கருவாட்டு மீன் கறியும், முழுப்பூண்டும் பல் பல்லாக பிரித்து ஒரு கூட்டு இருந்தது, இது என்ன எங்கேயும் பார்க்காதது என ஆச்சர்யப்பட்டேன், அவள் ஊரில் இது ரொம்ப பேமஸ்'ன்னு சொன்னாள், சாப்பிட்டு முடித்து பலகதைகள் சிரிச்சி பேசினோம், நாம என்னா சொன்னாலும் சிரிப்பாள் அப்பிடி ஒரு கிலுக்கான்பெட்டி...

சற்று அமைதியானவள், அவளை பற்றி சொல்ல ஆரம்பித்தாள் கண்ணீர்களோடு.......

எனக்கு கொழும்பில் உள்ள வத்தளை'தான் ஊர், இதுக்கு முன்னாடி அந்த ஊரிலிருந்து [[ஊரின் பெயர் மறைக்கப்பட்டுள்ளது]] இங்கே குடிபெயர்ந்தோம் போரில் அப்பா இறந்துபோனார், என் புருஷன் இயக்கத்தில் இருந்தார், ஒரு சண்டையில் காலை இழந்துவிட்டார், ஆகவே பிழைப்புக்காக கொழும்பு வந்துவிட்டோம்...

வயதான அம்மாவோடும், காலில்லாத புருஷன் இரண்டு வயது மகனையும் வச்சிகிட்டு நான் பட்ட அவஸ்தை கொஞ்சநஞ்சமில்லை, சாப்பிட கூட பட்டினியாக இருந்த நாட்களுண்டு, சுர்ரங்களும் சொந்தங்களும் நிலையில்லாமல் வாழும் போது யாரிடம் போயி உதவி கேட்பது....

அழுகிறாள் மூக்கை துடைத்தவாறே, நானும் அழட்டும் அழுதால் மனசு லேசாகுமேன்னு கேட்டுட்டு  இருந்தேன்....அழுது முடித்தாள், இப்போ என்ன பிரச்சினைன்னா நான் வாங்கும் சம்பளமும் டிப்சும் எனக்கு போதவில்லை [[ இவள் மானமுள்ளவள் என்பதற்கு இதுவே சாட்சி, ஏன்னா இங்கே ஹோட்டலில் வெயிட்ரசா வரும் பெண்கள் திசைமாறி, லட்சகணக்கில் சம்பாதிக்கிறார்கள், அதனால்தான் தப்பாக நடந்த அந்த அரபிக்கு செருப்படி கொடுத்திருக்கிறாள்]]

சரி இந்தமாதம் ஊருக்கு பணம் அனுப்பினாயா என்று கேட்டேன், அனுப்பினேன் ஆனால் அது பத்தாது என்று என் மாப்பிளை திட்டுகிறார்'ன்னு சொல்லவும், உனக்கு எவ்வளவு பணம் வேண்டும் சொல் நான் அரேஞ்ச் பண்ணித்தாறேன்னு சொன்னதும், ஓ என அழ ஆரம்பித்து விட்டாள், அப்போ என் சுயநலத்திற்காகவே உன்னை நான் ரூமுக்கு கூப்பிட்டேன்னு நீயும் நினைச்சிட்டியே'ன்னு அழ எனக்கு சங்கடமா போச்சு....

பின்னே எப்பிடியோ சமாளிச்சி, சிரிக்க வச்சி, நீ என்ன படித்திருக்கிறாய்'ன்னு கேட்டேன், டிகிரி என்றாள், ஓகே உனக்கு வேறே வேலைக்கு முயற்சி பண்ணட்டுமா ஹோட்டல் இல்லாத கம்பெனிகளுக்கு எனக்கேட்டேன், சரி என்றாள், அவள் முழு டீடெயிலும் கேட்டு வாங்கி வந்துட்டு ரெண்டுநாளா உக்கார்ந்து சிவி தயார்பண்ணினேன் நண்பர்கள் உதவியுடன்.

நானே எங்கெல்லாம் வேலைவாய்ப்பு இருக்கோ அங்கெல்லாம் சிவி அனுப்பினேன், ம்ஹும் ஒரு பதிலும் இல்லை, அப்புறமா நண்பர்கள் மூலமா எங்கேடா அக்கவுண்டன்ட் வேக்கன்சி இருக்குன்னு பிரஷர் கொடுக்க, ஒரு பெரிய கம்பெனியில் அவளுக்கு வேலை கிடைத்தது என் மலையாளி நண்பன் மூலமாக....!!!

சம்பளம் அப்பவே 300 தினார் [[இந்திய மதிப்புக்கு 38000 ரூபாய் இருக்கும்னு நினைக்கிறேன்]] இப்போ கண்டிப்பா அந்த கம்பெனி பொருத்தவரை 800 தினார் கிடைக்கும்னு நண்பர்கள் சொல்கிறார்கள்...!!! அதாவது ஒரு லட்சம் ரூபாய்...!!![[பஹ்ரைன்ல வேலையில்லாமல் இருந்தால் எப்பிடியாவது வேலை கிடைக்க முயற்சிக்கலாம் ஆனால் ஊரில் இருந்து யாரையும் உடனே கொண்டு வரமுடியாது, அதற்க்கு நடைமுறை சாத்தியங்கள் குறைவு]]

கடைசி வேலை நாளன்று வேலையை முடித்துவிட்டு நேரே என்னிடத்தில் வந்தவள், உன் கையை தா மனோ என்றாள், ஹே என்ன இது, ஆட்கள் வந்துபோகும் இடம் நீ போ என்றேன் ஆனாலும் விடவில்லை, என்கையை பற்றி அவள் நன்றி சொன்னபோது, அவள் கையின் அழுத்தம் எனக்கு ஆயிரம் வாழ்க்கை கண்ணீர் கதைகள் சொல்லியது...!!!

ம்ம்ம் அப்புறமென்ன அம்மிணி வாழ்க்கை செம ஜாலி ஆகிருச்சு, டபுள் பெட்ரூம் பிளாட் எடுத்து, ஒரு சிங்களப் பொண்ணும் இவளுமாக தங்கினார்கள், ரூமுக்கு வாடகை கம்பெனி கொடுத்தது, வாரலீவில் நானில்லாமல் இருக்கமாட்டாள், கும்மாளம் போட்டு கொண்டிருந்தோம் நண்பர்களெல்லாம் [[அதெல்லாம் ஒரு காலம்ய்யா]]

எனக்கும் கம்பெனிக்கும் ஏழரை சனி உச்சத்தில் இருந்ததால் வேலையை ராஜினமா செய்து வெளியேவர, ஊருக்கு போயிட்டு திரும்ப வரும் போது அவள் போன் நம்பர் மிஸ்ஸிங், நேரே ரூமுக்கு போனால் அங்கேயும் காலி செய்து போய்விட்டதாக சொன்னார்கள். நானும் அப்படியே விட்டு விட்டேன். இதைபோல ஆண் நண்பர்களும் மிஸ்ஸானது உண்டு...!!!

முந்தாநாள் திடீரென ஒரு போன் மொபைலில் வந்தது, "ஹலோ நான் யாருன்னு "சொல்லு" பார்க்கலாம்"??? ஆஹா பல்பு வாங்கப்போறோமோ நம்ம பதிவர்கள் சங்கமா இருக்குமோன்னு நினைக்கவும், யாரா இருந்தாலும் என்னை ஒருமையில் பேசுவது, அக்காக்களும் தங்கைகளும், அண்ணிகளும்தானே அதுவும் உறவை சொல்லித்தான் ஒருமையில் அழைப்பார்கள் இது என்னடா கூத்து என குழம்ப...[[நண்பன் ஒருவனை எதேயச்சையாக கண்டு அவனிடமிருந்து போன் நம்பர் வாங்கினாளாம்]]

மாமோய் தெரியுதாடா இப்போது என்றாள், ஹேய் நிவேதிதா என்றேன், மாமோய் நான் நிவேதிதா இல்லை நிவேதா, நீ இன்னும் பெயர் உச்சரிப்புல தடுமாறிட்டுதான் இருக்குறியா என அழகாக சிரித்து கலாயித்தாள்....தொடர்ந்து பேசினேன், போன் பேசாததர்க்கு கோபப்பட்டாள், உடனே வீட்டுக்கு அழைத்தாள், எனக்கு இப்போ முன்னே மாதிரி லீவெல்லாம் இல்லை பொறு டியூட்டி முடிஞ்சதும் வாறேன்னு சொல்லி, போனேன்.

அங்கே அதே சிங்களப் பொண்ணுடன்தான் இருந்தாள், பயங்கர மாற்றம், ஆடம்பரம் [[ஆனால் இவள் வழி விலகவில்லை என்பது சைக்காலஜிக்கா புரிந்து கொண்டேன்]] நான் விரும்பும் கருவாட்டு மீன்கறி மணக்க மணக்க பரிமாறினாள், ஏ யப்பா இதை மாதிரி கறி என் வாழ்க்கையில எங்கேயும் சாப்பிட்டது இல்லை [[கருவாட்டு மீன் கறி]]

ஊரில் இஷ்டம்போல நிலம் வீடுகள், கடைகள் வாங்கி வாடகைக்கு விட்டுருப்பதாகவும், அவள் கணவன் அவைகளை கவனிப்பதாகவும் சொன்னாள், வளமான வாழ்க்கை இப்போது, ஆனால் அனுபவிக்க வேண்டியவர்கள் விதை ஆகிவிட்டார்கள் என விம்மும் போது என் ரத்தமெல்லாம் சோனியா பூந்தியை நினைத்து ரணமாக கொதித்தது....

விடைபெறும் நேரம், மாமோய் அடிக்கடி நான் கூப்பிடலைன்னாலும் நீ வீட்டுக்கு வந்து போகணும், உன்கிட்டே பேசுனா எனக்கு எம்புட்டோ ஆறுதலா இருக்குன்னு சொல்லி கையை பிடித்தாள், அவள் கண்களின் பிரகாசமும், கையின் இறுக்கமும் அநேகமாயிரம் கதைகள் சொன்னது....!!!

ம்ம்ம்ம் இனி மறுபடியும் ஜாலிதான் என நினைத்த எனக்கு, லீவும் கிடையாது ஒரு கோப்பும் கிடையாது என்ற நிஜம் முகத்தில் அறைகிறது...!!! என் தோழி கருப்பு அழகி திரும்ப கிடைத்து விட்டாள்....ஆள் பார்க்க லேசா மாளவிகா மாதிரி இருப்பாள், இதை சொல்லி சொல்லி, அந்த கருப்புதான் எனக்கு பிடிச்ச கலரு பாட்டை சொல்லி சொல்லி கலாயிப்பேன். 

உன்னை பற்றி பதிவு போடட்டுமான்னு கேட்டேன், போட்டுக்கோ மாமோய் [[மாமா அல்ல மாமோய்'தான் அவிங்க ஊர்ல நேசிக்கிரவிங்களை மாமோய்'ன்னு கூப்பிடுவது வழக்கமாம்]] ஆனால் நாங்க ஆதியில் இருந்த பூர்வீக ஊரை சொல்லாதே என கேட்டுக்கொண்டாள் என் கருப்பு தேவதை....!!!!

"மனோ"தத்துவம் : சர்வ சிருஷ்டியும் படைத்த தெய்வம் தறாததை எவனும் நமக்கு தரமுடியாது, அதே தெய்வம் தருவதை எந்த கொம்பனும் தடுக்கமுடியாது....!!!!


டிஸ்கி : இன்ட்லி'ல குத்தி பரிந்துரை செய்யவும்....